Новости территориальных организаций

Кәсіподақ белсенділерін жүйелі түрде оқыту – кәсіподақ мүшелерінің құқықтары мен мүдделерін сапалы әрі білікті қорғаудың кепілі. Осы мақсатта Оқу-ағарту, бюджеттік ұйымдар, ғылым және жоғары білім қызметкерлерінің «Жетісу» жергілікті кәсіподағы филиалдарды аралап, бастауыш кәсіподақ ұйымдарының төрағаларына арналған семинар ұйымдастыруда.

«Кәсіподақ қызметінің негізгі бағыттары: бастауыш ұйым төрағасының рөлі мен жауапкершілігі» тақырыбындағы семинар Көксу ауданында жалғасты.  Құрамында 42 бастауыш ұйымы бар филиал аталған семинарды Қадырғали Қосымұлы Жалайыри атындағы орта мектеп-гимназиясында өткізді.

Кәсіподақ мүшелерінің кәсіби дамуы мен біліктілігін арттыру үшін ұйымдастырылған шараны Көксу аудандық филиалдың төрағасы Дина Нүсіпова ашып, бастауыш ұйымдардағы төрағалардың жауапкершілігі мен атқаратын қызметі жайында сөз етіп, семинар жұмысының мақсатын айқындап берді.

Облыстық кәсіподақ ұйымының бас маманы Алуа Қабдулова кәсіподақтағы іс қағаздарының рәсімделуі, хаттамалардың толтыру реті, құжаттардың жинақталуы, бұқаралақ ақпарат  құралдарымен байланысы туралы ақпарат беріп, кәсіподақтың тиімді тұстарын ашып көрсетті.

Қ. Жалайыри атындағы орта мектеп-гимназиясы бастауыш кәсіподақ ұйымының төрағасы Жадыра Абишева  өзінің тәжірбиесімен бөлісті. Жұмысты жоспарлау, туындайтын мәселелердің шешілу жолдарын, кәсіподақ мүшелерінің белсенділіктерін арттырудағы белсенді жұмысын таныстырды.

Ал, облыстық ұйымның заңгер-кеңесшісі Әсет Қайырхан білім саласындағы өзгерістер туралы баяндап, педагогтарға еңбекақы төлеу, апталық жүктемені бөлу, қосымша жүктемелерді орындау, ұжымдық шарттың маңыздылығы, заңсыз жұмыстан шығару, тегін медициналық тексеруден өту сынды маңызды мәселелер бойынша түсіндіру жұмыстарын жүргізді. Сонымен қатар келісім комиссиясының мүшелерін оқыту жұмыстары тұрақты жүргізілгенін жеткізді.

Семинар соңында туындаған сұрақтарға кәсіподақ өкілдерін жауап берді. Маңызды шара алдағы уақытта да жалғасатын болады.

Жетісу облыстық кәсіподақ ұйымы