ҰСТАЗДЫҚ - ҰЛЫ ҚАСИЕТ
Педагог мамандығы тек білім беру ғана емес, бұл жүректен жүрекке жол табатын үлкен өнер. Заманауи білім беру жүйесі қарқынды дамыған кезеңде мектептің қалыпты жұмысын қамтамасыз етіп, әдістемелік бағыт-бағдар беруші орынбасарлардың еңбегі орасан зор. Осындай өз ісіне берілген кәсіби маман, ұжым мен оқушылар арасында үлкен беделге ие тұлғалардың бірі — № 24 жалпы білім беретін мектептің оқу ісі жөніндегі орынбасары, білікті физика пәнінің мұғалімі Емешова Жамила Мұналқызы.
Жаратылыстану ғылымының терең логикасы мен жүйелілігін жанына серік еткен ұстаздың әрбір күні ізденіске, жаңашылдыққа және балалардың жарқын болашағына бағытталған. Физика ғылымының қатаң заңдылықтары мен дәлдігін өмірлік ұстанымымен ұштастыра білген Жамила Мұналқызының басшылық қызметтегі басты ерекшелігі — сабырлық пен ақылдың үйлесімі.
Мектеп қабырғасындағы оқу-тәрбие үдерісін үйлестіру, әр мұғалімнің әлеуетін ашу, жас мамандарға бағыт-бағдар беру — үлкен жауапкершілікті талап етеді. Осындай жауапты міндеттерді атқару барысында Жамила Мұналқызы физикалық есептерді шешкендей байсалдылық танытып, кез келген мәселенің дұрыс шешімін табуға үлкен парасаттылық көрсетеді.
Кәсіби қызметі мен ұстанымдары төмендегі бағыттарда ерекше көрініс табады: физика пәнін терең меңгертіп қана қоймай, оқушылардың сыни тұрғыдан ойлау қабілетін дамытуға үлес қосады. Оқу бағдарламаларының сапалы орындалуын қадағалау, сабақ кестесінің сапалы құрылуы және педагогтардың біліктілігін арттыру ісінде ол әрдайым жоғары талап қоя біледі.
Жаңа форматтағы оқыту әдістері мен жаратылыстану пәндерін оқытудың заманауи тәсілдерін мектеп өміріне енгізуде ұстаздар қауымына әдістемелік көмек көрсетеді.Ұстаздық жолда әріптестерінің сенім артуы — үлкен бақыт. Физика пәнінің мұғалімі ретінде де, оқу ісінің орынбасары ретінде де Жамила Мұналқызы мектеп ұжымындағы әрбір педагогтың пікірімен санасып, олардың бастамаларын қолдай білетін парасатты басшы. Ұтымды ұйымдастырушылық қабілеті, нақтылығы мен адамгершілік қасиеттері әріптестері тарапынан әрдайым жоғары бағаланады.
Мектептің оқу-тәрбие үдерісіндегі жетістіктері мен оқушылардың білім сапасының артуы тікелей осы жауапты басшының қажырлы еңбегімен тығыз байланысты. «Жақсы маман — елдің тірегі» десек, физика пәнінің тереңдігін бойына сіңірген Жамила Мұналқызы өз ісіне адал, жүрегі мейірімге толы нағыз ұстаз-жетекші. Оның «Сабырлығы ақылымен жарасқан» мінезі мен өмірлік ұстанымы жас буынға үлгі, ал атқарып жатқан еңбегі туған мектебінің абыройы. Еңбегіңіз жемісті, абыройыңыз асқақтай берсін!
З. Джанаева
Ақтау қаласы, №24 жалпы білім беретін мектептің орыс тілі мен әдебиеті пәні мұғалімі
