КӘСІПОДАҚ ҰЙЫМЫНЫҢ НЕГІЗГІ ЖҰМЫСЫ – ЕҢБЕК АДАМЫНЫҢ ҚҰҚЫҒЫН ҚОРҒАУ
Семинардың басты мақсаты – жұмыс берушілер мен қызметкерлер арасындағы еңбек қатынастарын ҚР Еңбек кодексі шеңберінде реттеу. Тарбия Байымбетова өз сөзінде Еңбек кодексінің 52-бабы, 1-тармағының 24-тармақшасына сәйкес, зейнеткерлік жасқа толған қызметкерлермен еңбек шартын бұзу тәртібін егжей-тегжейлі түсіндіріп өтті.
Семинарда қаралған негізгі мәселелер:
- Хабарландыру мерзімі: Жұмыс беруші қызметкермен еңбек шартын бұзу туралы шешім қабылдаған жағдайда, бұл туралы кемінде бір ай бұрын хабарлауы тиіс.
- Өтемақы төлемдері: Ұжымдық шарт негізінде зейнеткерлікке шығуға байланысты берілетін біржолғы жәрдемақы мөлшері мен оның төлену талаптары.
- Шартты ұзарту мүмкіндігі: Жоғары кәсіби біліктілігі бар қызметкерлермен өзара келісім бойынша еңбек шартын жыл сайын ұзарту тетіктері.
Кездесу барысында кәсіподақ мүшелерінің әлеуметтік пакеттері, соның ішінде шипажайлық емделуге жолдамалар алу және еңбек дауларын болдырмау мәселелері де сөз болды. Қарақия аудандық білім беру ұйымдарының директорлары көкейкесті сұрақтарын қойып, заң аясындағы түйткілді мәселелердің шешімін тапты.
«Кәсіподақ – бұл тек мерекелік шаралар ұйымдастырушы емес, ең алдымен әрбір мұғалім мен тәрбиешінің құқықтық қорғаны. Зейнет жасына жеткен ұстаздарымыздың еңбегін құрметпен бағалап, олардың заңды құқықтарының бұзылмауын қадағалау – біздің басты міндетіміз», - деп атап өтті Тарбия Баймбетова.
Семинар соңында қатысушыларға әдістемелік нұсқаулықтар таратылып, алдағы уақытта да осындай құқықтық сауаттылықты арттыру шаралары тұрақты түрде өткізілетіні айтылды. Бұл шара білім беру саласындағы еңбек қауіпсіздігі мен әлеуметтік әріптестікті нығайтуға бағытталған маңызды қадам болды.
Маңғыстау облыстық ұйымының Қарақия аудандық филиалы
