ӨЗ ІСІНІҢ ШЕБЕРІ
Ұстаз – білім беруші ғана емес, ол шәкірт жүрегіне жол таба білетін тұлға. Осындай қасиеттерді бойына тоғыстырған, өз ісіне жауапкершілікпен қарайтын білікті педагогтардың бірі – Раева Мария Серікқызы.
Раева Мария Серікқызы Қ.Жұбанов атындағы Ақтөбе мемлекеттік университетінің Шетел тілдері факультетін үздік тәмамдап, неміс және ағылшын тілі пәндерінің мұғалімі мамандықтарын алды. Сонымен қатар құқықтану саласы бойынша жоғары білім алып, Швейцарияның Монтре қаласындағы Еуропа университетінде «Қоғаммен байланыс және коммуникация» бағыты бойынша докторлық дәрежеге ие болды.
Еңбек жолын 1998 жылы Қобда ауданында ағылшын тілі пәнінің мұғалімі болып бастаған. Әр жылдары жоғары оқу орындарында оқытушы, аға оқытушы, доцент қызметтерін атқарып, оқу-әдістемелік және ғылыми жұмыстарды ұйымдастыруға белсене араласты. 2015 жылдан бері Қызылжар орта мектебінде ағылшын тілі және құқық негіздері пәндерінен сабақ береді.
Мария Раева – оқушылардың ғылыми-зерттеу жұмыстарына жетекшілік етіп, шәкірттерін аудандық, облыстық, республикалық және халықаралық деңгейдегі байқауларға дайындап жүрген тәжірибелі ұстаз. Сонымен қатар неміс тілі бойынша республикалық онлайн курс жетекшісі, Қазақстан халқы Ассамблеясының мүшесі.
2018 жылдан бері білім саласындағы кәсіби медиатор-тренер ретінде мұғалімдерге арналған семинарлар өткізіп, мектептерде медиация мәдениетін дамытуға үлес қосып келеді. 2024 жылы М.Акмулла атындағы Башқұрт мемлекеттік педагогикалық университетінің аспирантурасын үздік аяқтады. Қазіргі таңда педагогика ғылымдары кандидаты ғылыми дәрежесін алу бағытында ғылыми жұмысын жалғастыруда.
Еңбегі жоғары бағаланып, көптеген марапаттар мен сертификаттарға ие болған. 100-ден астам ғылыми мақаланың авторы, педагогикалық кәсіби байқаулардың бірнеше дүркін жеңімпазы.
Раева Мария Серікқызы – білім мен тәрбиені ұштастыра білген, жаңашыл көзқарастағы, шәкірт пен әріптес құрметіне ие болған өз ісінің нағыз шебері. Оның еңбегі жас ұрпаққа үлгі, әріптестеріне өнеге.
