АУЫЛ МҰҒАЛІМДЕРІНІҢ ШЕБЕРЛІКТЕРІ БАҒАЛАНДЫ
Ақтөбеде Хромтау, Әйтеке би, Ырғыз және Қобда аудандық білім қызметкерлері кәсіподағы ұйымының қолдауымен жалпы білім беретін мектептердің ауыл мұғалімдеріне арналған “Үздік биология пәнінің мұғалімі – 2025” облыстық байқауының аудандық кезеңі өтті. Байқау биология пәні мұғалімдерінің кәсіби әлеуетін нығайтуға, педагогтардың жаңашыл тәжірибесін дәріптеуге, сонымен қатар ауыл мектептеріндегі білім сапасын арттыруға бағытталды.
Шараның басты мақсаты – биология пәні мұғалімдерінің кәсіби шеберлігін арттырып, заманауи цифрлық ресурстарды, білім берудегі жаңа әдістемелерді және жасанды интеллект технологияларын оқу процесіне тиімді енгізуге қолдау көрсету. Сонымен бірге педагогтардың инновациялық тәжірибесін анықтап, оны өзге әріптестерге тарату да байқаудың маңызды бағыттарының бірі болды.
Қатысушы мұғалімдер бірнеше бағыт бойынша өз шеберліктерін көрсетті. Әділқазылар алқасы мұғалімдердің шығармашылығына, ғылыми-әдістемелік дайындық деңгейіне, педагогикалық технологияларды меңгеруіне және оқытудағы инновациялық тәсілдеріне ерекше назар аударды.
Байқау қорытындысы бойынша жүлделі І, ІІ, ІІІ орын және арнайы номинациялар иегерлері анықталды. Әрбір жеңімпаз бен жүлдегер аудандық білім бөлімі атынан дипломдармен марапатталды.
Сонымен қатар, аудандық білім қызметкерлері кәсіподағы ұйымының қолдауымен үздік педагогтарға шипажайға және тарихи-танымдық саяхатқа жолдамалар, ақшалай сыйақылар табысталды.
Бұл марапаттар ауыл мұғалімдерінің еңбегін бағалауға, олардың кәсіби дамуына ынталандыру жасауға үлкен серпін берді.
“Үздік биология пәнінің мұғалімі – 2025” байқауының аудандық кезеңдері биология пәні мұғалімдерінің кәсіби белсенділігін арттырып қана қоймай, білім саласындағы инновацияларды қолдаудың маңызын тағы бір мәрте дәлелдеді. Мұндай білім бәйгелері ауыл мұғалімдеріне шабыт беріп, өңірдегі білім беру сапасының жаңа деңгейге көтерілуіне ықпал етері сөзсіз.
-
Фотографии
-
