МАРАПАТ ӨЗ ИЕСІН ТАПТЫ
Ұлағатты ұстаздардың еңбегі жоғары бағаланды. Жезқазған аймақтық білім және ғылым қызметкерлерінің жергілікті кәсіптік одағының төрағасы Марат Қоңырбаев жас ұрпақты білім нәрімен сусындатып, жақсы қасиеттерді бойларына дарытып, адамгершілік рухта бағыт-бағдар берген әріптестерін «ЕҢБЕК АРДАГЕРІ» медалімен марапаттады.
– Баршаға жан шуағы мен жайдары көңіл-күй сыйлайтын Жаңа жыл мерекесі – өткенімізді саралап, ертеңімізді бағамдайтын керемет сәт. Өтіп бара жатқан жыл еліміз үшін Тәуелсіздігіміздің 30 жылдығымен ерекшеленді. Ендеше, Егемендік тойы баршаңызға құтты болсын. Ең басты құндылығымыз – Тәуелсіздігіміздің тұғыры биік, бейбітшілігіміз баянды болсын, – деп мерекелік кездесуді өз құттықтауымен ашқан Марат Сейілбекұлы саналы ғұмырын білім беру саласына арнаған үздіктерге құрмет көрсетті.
«Еңбек ардагері» медалі қырық жыл бойы жүрек қалауымен таңдаған мамандықтың ыстығы мен суығына төзіп, қызығы мен шыжығына шыдаған №11 жалпы білім беретін орта мектептің қазақ тілі мен әдебиеті пәнінің мұғалімі Рақияш Рақымқызы Жолдыбаеваға, жиырма жылдан астам уақыт №26 гимназияға басшылық еткен, бүгінде құрметті еңбек демалысындағы Татьяна Ивановна Панкрашкинаға, Қаныш Сәтбаев атындағы №7 мектеп-лицейдің жоғары санатты бастауыш сынып мұғалімі Баян Хамитқызы Бектұрова мен №8 гимназияда табан аудармастан еңбек етіп келе жатқан орыс тілі мен әдебиеті пәні мұғалімі Алма Топышқызы Бляловаға жараса кетті. Ұзақ жылғы табысты еңбегі лайықты бағасын алған ұстаздармен бірге әріптесіміз, кәсіподақ қозғалысын дамытуға сүбелі үлес қосқан Сәмет Қойшығарақызы Досетова да мадақталды. Қазіргі таңда аймақтық кәсіподақта бас бухгалтер қызметін абыроймен атқарып жүрген Сәмет Қойшығарақызы Жезқазған қаласының экономика мен қаржы саласын дамыту мен жетілдіру ісіне өмірінің 43 жылын арнады.
Өздеріне көрсетілген құрмет пен қошеметке разы болған еңбек ардагерлері жарыса сөз алып, білім саласы қызметкерлерінің мүддесін қорғаумен қатар, еңбегін ынталандыруды, денсаулығын нығайтуды басты міндеті санайтын Марат Қоңырбаев бастаған ұжымға алғыстарын жаудырды.
Жезқазған аймақтық білім және ғылым
қызметкерлерінің жергілікті кәсіптік одағының баспасөз қызметі
қызметкерлерінің жергілікті кәсіптік одағының баспасөз қызметі
