«ҰСТАЗЫ ЖАҚСЫНЫҢ ҰСТАМЫ ЖАҚСЫ» ҮРЖАР АУДАНЫНДА «ӨНЕГЕЛІ ӨМІРДІҢ БАСТАУЫ – ҰСТАЗДАР» АТТЫ САЙЫС ӨТТІ
Адам баласы ұстаз ұғымын ұлықтамаса тәлімсіз, қағидасыз қалып, адамдық келбетін айқындай алмай тығырыққа тірелетіні сөзсіз. Терең ойлы ғалым да, от тілді ақын да, ел бастаған көсем де, сөз бастаған шешен де ұстаздың алдынан білім алып, тәрбиесін көретіні белгілі. Еңсесі биік егеменді еліміздің адалдықты ту еткен алғыр ойлы, адал азамат ұл – қыздарына сапалы білім, саналы тәрбие беруде талмай еңбек етіп жүрген ұстаздар арасында олардың шеберліктері мен шығармашылықтарын көріп, саралап, өзге педагогтарға үлгі болу мақсатында Шығыс Қазақстан облысы, Үржар ауданында қарасты білім бөлімі басшысы Жүнісова Сауле Орынбайқызы мен аудандық білім және ғылым қызметкерлері кәсіподақ ұйымының төрағасы Жынғылбаев Жанболат Жұмагелдіұлының бастамасымен Үржар ауданының білім беру ұйымдары, оның ішінде орта, негізгі мектептер мен балабақша арасында бірнеше номинация бойынша «Өнегелі өмірдің бастауы –Ұстаздар» атты байқауы өтті.
Өз бағын сынап, шеберлігін шыңдағаан ұстаздар, өз өнерлерін көрсетіп сынға түсті. Сайыс нәтижесінде оқ бойы озық болып, «Абылайхан орта мектеп –бақша» КММ «Үздік мектеп» номинация бойынша бас жүлдені иеленді. Осы номинация бойынша шағын кешенді мектеп арасындағы жүлдені «Кішкенетау негізгі мектеп-бақшасы» КММ ұтып алды.
«Жыл мұғалімі» номинациясы бойынша «Кішкенетау негізгі мектеп-бақшасы» КММ 17 жыл еңбек өтілі бар, педагог-зерттеуші, бастауыш сынып мұғалімі, Шакенова Мәнсия Оралқызы бас жүлде иегері атанса, «Үздік сынып жетекшісі» номинациясы бойынша бас жүлдені аталған мектептің 8 жыл еңбек өтілі бар, педагог- модератор, қазақ тілі пәнінің мұғалімі Сағындықова Самал Тоқанқызы жеңіп алды.
Жеңімпаз педагогтар өз білімі мен шебер маман екенін әр ісінде дәлелдеп отырды. Сайыс жеңімпаздарына 3 салалы түрлі-түсті принтер құрылғысы сыйға тартылды және Алғыс хаттарымен марапатталды.
Қазіргі қоғамдағы тәрбиенің рөлін арттыру, тәрбие үрдісін жетілдіру, тәрбие субъектілерінің құзырлылығын дамыту, заманауи біліммен келешек ұрпақты сусындандыру, жаңа әдіс-тәсілдермен бөлісіп, әріптестеріне үлгі болған марапат иелеріне алдағы уақытта сәттілік тілейміз.
Ж. Жынғылбаев,
Семей аймақтық білім және ғылым қызметкерлерінің
филиалы Үржар аудандық кәсіподақ ұйымының төрағасы
-
Фото
-
