«КӘСІПОДАҚ. ЖАСТАР. ДАМУ» ЖАС ПЕДАГОГТАР ФОРУМЫ
«Қазақстандық салалық білім және ғылым қызметкерлері кәсіптік одағының Павлодар облыстық ұйымы» ҚБ қарасты Жастар кеңесі «Кәсіподақ. Жастар. Даму» атты жас педагогтар форумын өткізді. Форум Ертіс ауданының №2 ЖОББ мектебінің қабырғасында өткізілді.
Шараның мақсаты аудандағы жас педагогтардың құқықтық сауаттылығын арттыру, көшбасшылық қасиеттері бар, жас мұғалімдердің мүдделерін білдіре және қорғай алатын бастамашыл және креативті жас педагогтардың ой-пікір алмасу алаңын құру, белсенді кеңес мүшелерін ынталандыру, жас мамандарды кәсіподақ қозғалысына жұмылдыру.
Шараға Ертіс ауданының түкпір-түкпірінен жиналған жас мамандар қатысты. Форумның ашылу салтанатында Павлодар облыстық білім беру саласы кісіптік одағының төрайымы төрайымы Г.Ә. Науразбаева алғы сөз айтып, кәсіподақ жұмысына шолу жасады. Сөз соңында жас педагогтарды алдағы келе жатқан референдумға атсалысып, азаматтық міндетін атқаруға шақырды.
Форум барысында ауданның жас педагогтары облыстық жастар кеңесінің белсенділерімен танысты. Облыстық Жастар кеңесінен жас педагогтармен жұмыс істеуге кеңес төрайымы, Павлодар қаласының №43 ЖОББМ қазақ тілі мен әдебиеті мұғалімі Айнұр Әбілдинова, Ақсу қаласының №4 ЖОМ мұғалімі Фархат Еңсебаев, Павлодар қаласының № 36 ЖОМ дене шынықтыру мұғалімі Дмитрий Карпеченко, Павлодар қаласының №33 ЖОМ шахмат оқытушысы Нұрғиса Теміржанов, Павлодар қаласының №34 инновациялық үлгідегі ЖОМ Әлібек Төлеуов, Павлодар қаласының № 29 ЖОМ музыка мұғалімі Олдас Омаров, Ақтоғай ауданының білім беру бөлімінің қызметкері Павел Тілеу атсалысты.
Жас мамандар 5 фокус тобында өз білімдері мен өнерін ортаға салды. Форум соныңда ең белсенді жас педагогтар бағалы сыйлықтарға ие болып, қатысушыларға салтанатты түрде сертификаттар табысталды.
Айнұр Әбілдинова
«Қазақстандық салалық білім және ғылым қызметкерлері
кәсіптік одағының Павлодар облыстық ұйымы» ҚБ қарасты
Жастар кеңесінің төрайымы.
