ҚЫЗЫЛОРДАДА БІЛІМ ҚЫЗМЕТКЕРЛЕРІ АРАСЫНДА МҮШӘЙРА ӨТТІ
Биыл ұлтымыздың ұлы тұлғаларының бірі - Ахмет Байтұрсынұлының 150 жылдығы. Мерейлі жылға орай білім саласы қызметкерлері арасында жазба ақындарымыздың облыстық мүшәйрасы болып өтті. Сайысқа қалалық, аудандық кезең жеңімпаздары мен колледж жеңімпаздарынан барлығы 17 қатысушының шығармалары ұсынылды.
Қазылар алқасының құрамында - Дүйсенбек Аяшұлы («Сыр бойы» газетінің бөлім меңгерушісі, Қазақстан Журналистер және Жазушылар Одағының мүшесі), Бауыржан Тәжмағанбетұлы («Өрлеу» Қызылорда облысы бойынша педагогикалық қызметкерлердің біліктілігін арттыру институтының директоры, физика – математика ғылымдарының докторы, профессор), Назгүл Бердіқожа (ақын, Қазақстан Жазушылар Одағының мүшесі, Мемлекеттік Жастар сыйлығының иегері, Мұқағали Мақатаев төсбелгісінің иегері, Қорқыт Ата атындағы Қызылорда университетінің оқытушысы), Гүлнар Бабабекқызы (Қызылорда облыстық білім және ғылым қызметкерлері кәсіподақ ұйымының төрағасы, облыстық мәслихат депутаты) және Ержеңіс Тастыбайұлы (айтыскер ақын) төрелік етті.
Облыстық мүшәйраны қазылар алқасының төрағасы Дүйсенбек Аяшұлы ашып, қатысушыларға сәттілік тіледі. Алаш ардақтысы, реформатор ғалымның елді ағарту жұмыстарындағы рөлі, тіл мен әдебиет ғылымдарының негізін салудағы зор еңбегіне тоқталды.
Әрі қарай комитет төрағасы Гүлнар Есқалиева мүшәйраның өту тәртібі жайлы түсіндіріп, жазба ақындардың сайысқа ұсынған барлық шығармалары жинаққа шығарылатынын айтып қатысушыларға сәттілік тіледі.
Жазба ақындар мүшәйрасы тартысты өтті. Алаш ардақтысы жайында жаңа өлең жолдары жарық көрді. Ақындарымыздың марапаттау кезеңіне құрметті қонақтар Қазақстан Республикасы Парламенті Сенатының депутаты Мұрат Бахтиярұлы және Қазақстан Республикасының еңбек сіңірген қайраткері Ержан Убайдуллаұлы қатысты. Мұрат Бахтиярұлы шығармашыл ұстаздарды жеңістерімен құттықтап, білім қызметкерлері кәсіподағының жұмысына оң баға берді.
Әрі қарай әділ қазылар шешімі бойынша озық шығармалар авторлары Бас жүлде, І,ІІ,ІІІ орындармен және Алғыс хаттармен марапатталып, бағалы сыйлықтар табыс етілді.
Әріптестерді жеңістерімен құттықтаймыз. Қаламдарыңыз ұштала берсін, жазар таусылмасын!
