ӨЗ ІСІНІҢ ШЕБЕРІ
Ұстаздық мамандығын абыроймен атқарып келе жатқан жандардың бірі – Қызылорда облысының Қармақшы ауданындағы тәжірибелі мұғалім, педагог-зерттеуші Ниязов Серік Ұзақбайұлы.
Адал еңбек адамды әрдайым биікке жетелейді. Ұлттық құндылықтарды құрметтейтін, өз міндетін жауапкершілікпен атқаратын, тәжірибесі мол әрі жаңашылдыққа ұмтылған Серік Ұзақбайұлын өз ісінің шынайы шебері деп айтсақ болады. Оның еңбегі мен жетістіктері жас ұрпақты тәрбиелеудегі табандылықтың, ізденістің және еңбекқорлықтың жарқын үлгісі. Ол еліміздегі қиын кезең пандемия уақыттарында Республика оқушыларын еріктілер қоғамымен бірлесіп ҰБТ-ге онлайн дайындап жұмыс атқара білді. «Балапан» телеарнасында көрсетілген география пәні бойынша онлайн сабақтың сарапшысы қызметін атқарып, білім және ғылым министрінің алғыс хатын иеленді. Алыс-жақын бірнеше шет елдерде өз іс-тәжірбиесін бөліскен тәжірибелі педагог.
Серік Ұзақбайұлы «География пәнінде оқушыларды олимпиадаға дайындау жолдары» тақырыбында әдістемелік жұмыстармен нәтижелі көрсеткішке ие болып келеді. Осы зерттеу жұмысының негізінде оқушылары республикалық жалпы пәндік олимпиадаларда бірнеше мәрте жұлдегер, пәндік олимпиада нәтижесінде оқушысы Жақсылық Елдос «Үздік ауыл оқушысы-2019» атағын министр қолынан иеленген.
Ізденімпаз әрі жаңашыл педагог облыстық, республикалық сайыстарда Қызылорда облысының абыройын асқақтатып жүр. Ол «Үздік педагог - 2023» байқауында республикалық кезеңінің жүлдегері, Республикалық «Педагогикалық идеялар фестивалі - 2023» байқауының жүлдегері, Дарын республикалық ғылыми-практикалық орталығы ұйымдастырған «Олимп шыңы-2025» пәндік олимпиаданың жүлдегері болып табылады.
Ұстаздың қажырлы еңбегі лайықты түрде бағаланып келеді. Ол оқу-ағарту министрлігінің, облыстық білім басқармасының, облыстық білім қызметкерлері кәсіподағының және облыс әкімінің марапаттарына, төсбелгілеріне ие болған.
Ниязов Серік Ұзақбайұлы – тек өз ісінің шебері ғана емес, білім саласына адал қызмет етіп келе жатқан, ұрпақ тәрбиесіне шын жүректен үлес қосқан еңбек адамы. Оның өнегелі жолы – жас ұстаздарға үлгі, шәкірттеріне бағдар, қоғамға құнды еңбек.
