Аумақтық ұйымдардың жаңалықтары

Салалық кәсіподақтың Түркістан облыстық ұйымы Кентау қалалық кәсіподақ комитетіне қарасты Ақын-тұма №11 жалпы білім беретін мектебінде химия пәні мұғалімі Нафиса Маммаддинова және биология пәні мұғалімі Насиба Абулованың ұйымдастыруымен жас мамандар арасында «Smart Science: Химия мен биологиядағы жасанды интеллект мүмкіндіктері» тақырыбындағы «Қызық екен...» интеллектуалды ойыны кең көлемде, мазмұны терең әрі жаңашыл форматта өтті.

Шараның басты ерекшелігі – білім беру үдерісіне жасанды интеллект элементтерін енгізу арқылы мұғалімдердің заманауи технологияларды меңгеруіне жол ашу, шығармашылық қабілеттерін дамыту және пәндік әдістемеде жаңа бағыттарды игеруге ынталандыру. Мұндай орта жас мамандарға тәжірибе алмасуға, ой бөлісуге, бір-бірінен үйренуге зор мүмкіндік берді.

Іс-шара телевизиялық шоу стилінде ұйымдастырылып, химия мен биология ғылымдарының қызықтылығын ашуға бағытталды. Интеллектуалды ойын барысында қатысушылар түрлі тақырыптағы сұрақтарға жауап беріп, логикалық ойлауын, теориялық білімін, шапшаңдық пен командалық жұмыс дағдыларын шыңдады. Командалар өзара бәсекелестік танытумен қатар, бір-біріне қолдау көрсетіп, достық атмосферасын қалыптастырды. Жас мамандардың ғылымға деген қызығушылығы, өз білімдерін жетілдіруге деген талпынысы ерекше байқалды. Бұл олардың кәсіби өсіп, дамуға деген үлкен ниетінің айқын көрінісі.

Ойын қорытындысында қатысушы топтар І, ІІ, ІІІ орындарға ие болып, мадақтамалармен марапатталды. Шара жоғары деңгейде ұйымдастырылып, барлық қатысушыларға көтеріңкі көңіл күй сыйлады.

Кентау қалалық кәсіподақ комитеті білім саласындағы мұндай игі бастамаларды әрқашан қолдай отырып, жас мамандардың кәсіби дамуына бағытталған шаралардың жалғаса беруіне тілек білдіреді. Осындай мазмұны бай іс-шаралар ұстаздардың құзыреттілігін арттырып, білім сапасының жақсаруына зор үлес қосатыны сөзсіз.