ЕҢБЕК АДАМЫ
Аманғалиева Бейбінұр Ерсайынқызы - Ақтөбе педагогикалық училищесін «Үздік» дипломмен аяқтап, алғашқы еңбек жолын Ойыл ауданының Н.Крупская атындағы мектебінде бастауыш сынып мұғалімі болып бастады. 2003 жылы Қ.Жұбанов атындағы университетті бітіріп, «Бастауыш класты оқыту әдістемесі» мамандығы бойынша білім алды.
Қазіргі таңда Ойыл ауданы, Ш.Бекмұхамбетова атындағы мектеп-гимназиясында бастауыш сынып мұғалімі қызметін атқарып келе жатқан Бейбінұр Ерсайынқызы көптеген жетістіктерге қол жеткізген. 2009 жылы «Облыстың ең үздік мұғалімі» конкурсында жеңімпаз атанып, облыс әкімінің грантына ие болды. 2016 жылы «Үздік педагог-2016» республикалық байқауының облыстық кезеңінде жеңімпаз болып, 2017 жылы ҚР Білім және ғылым министрлігінің Алғыс хатымен марапатталды.
Оның авторлық бағдарламалары мен әдістемелік құралдары республика деңгейінде танылып, білім беру саласына зор үлес қосуда. «Математика әлемі», «Жаратылыс сыры» бағдарламалары мен «Бастауыш сынып оқушыларын ұлттық ойындар арқылы еңбекке баулу» атты әдістемелік құралдары кеңінен қолданысқа енгізілген. Бейбінұр Аманғалиева 2023 жылы Ы.Алтынсарин атындағы Ұлттық білім академиясының ғылыми-әдістемелік жұмысына қосқан үлесі үшін Алғыс хатқа ие болды.
Сонымен қатар, ол республикалық және облыстық семинарларға қатысып, өзінің іс-тәжірибесімен бөлісіп, шеберлік сабақтар жүргізуде. 2021 жылы Ақтөбе облысының «Үздік педагог-2021» атағына ие болып, төс белгі тағылған.
Бейбінұр Ерсайынқызының шәкірттері білім жарыстарында үнемі үздік көрсеткіштерге қол жеткізіп, оның ұстаздық еңбегін жоғары бағалауда.
Бейбінұр Аманғалиева өз кәсіби шеберлігі мен педагогикалық жаңашылдығы арқылы білім беру саласында айтарлықтай жетістіктерге жетіп, көптеген ұрпақтың білім мен тәрбиесіне зор үлес қосуда.
