Аумақтық ұйымдардың жаңалықтары

Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының мәжіліс залында облыстық кәсіподақ активінің Кәсіподақтар федерациясының «кәсіподақ десанты» өкілдерімен кездесуі өтті. Федерация төрағасының орынбасары Қайрат Айбосынов пен Федерацияның құқықтық қамтамасыз ету және халықаралық ынтымақтастық департаментінің директоры Тимур Нұғманов жұмыс сапары барысында алдымен Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының жұмысымен танысты.

Жергілікті кәсіподақ төрағасы Ерұлан Мағзымбеков қоғамдық бірлестіктің қызмет бағыттарымен, бүгінге дейін атқарылған жұмыстарымен таныстырды.

Келелі жиын салалық кәсіподақтың «Кәсіподақ үйінің» мәжіліс залында жалғасты. Оған кәсіподақтар федерациясының аймақтағы салалық ұйым өкілдері және бастауыш кәсіподақ ұйымдарының төрағалары, кәсіподақ белсенділері мен бұқаралық ақпарат құралдары өкілдері қатысты. Жиынды Жамбыл облысы кәсіподақтар орталығының төрағасы Бағлан Қарашолақов ашып, жүргізді.

- Биыл Қазақстан Кәсіподағының құрылғанына 120, ал Федерацияға 35 жыл толып отыр. Осы ретте, облысымызға федерациядан арнайы өкілдер келіп, өздеріңізбен кездесіп, пікір алмасуға ниетті. Осы мүмкіндікті пайдаланып, ойда жүрген, шешімін таппаған сұрақтарыңыз болса қойып, жауап алуларыңызға толық мүмкіндіктеріңіз бар, - деген Бағлан Жиенәліұлы басқосуды еркін форматта өткізуді ұсынды.

Алдымен сөз алған Қайрат Айбосынов Кәсіподақтар федерациясының қолға алып, атқарып жатқан жұмыстарымен таныстырды.

- Өздеріңіз жақсы білетіндей биыл федерацияның съезі өтеді. Оған сіздерден де делегаттар қатысатын болады. Біздің мақсат – осы кездесу қарсаңында өздеріңізбен кездесіп, пікір алмасу. Еңбек адамының мүддесін, құқығын қорғау. Жалпы, федерация жұмысына тоқталар болсам, былтыр біраз құжат қабылданды. Үш жақты келісімдер жасалды.

Республика деңгейінде біздің тарапымыздан 119 отырыс ұйымдастырылса, оның 19-ы өңірлерде өтті. Онда 338 мәселе қаралса, оның 107-і кәсіподақтар ұйымына тиесілі, - деп атап өткен Қайрат Бейсенбайұлы басқа да бағыттарға тоқталып, тарқата айтып берді.

Ал Федерацияның құқықтық қамтамасыз ету және халықаралық ынтымақтастық департаментінің директоры Тимур Нұғманов өз саласы бойынша ақпараттармен бөлісті. Сондай-ақ, жиын барысында жергілікті кәсіподақ мүшелері тарапынан қойылған сұрақтарға жауап беріліп, жиын соңы белсенді кәсіподақ мүшелерін марапаттауға ұласты.

Жамбыл облысы оқу-ағарту, ғылым және жоғары білім қызметкерлерінің жергілікті кәсіподағы.