Аумақтық ұйымдардың жаңалықтары

Жамбыл облысы оқу-ағарту, ғылым және жоғары білім қызметкерлерінің Жергілікті кәсіподағының Жамбыл аудандық филиалының VII кезектен тыс сайлау Конференциясы өтті. Конференцияға аудандағы 39 білім мекемесі мен ұйымдарынан жолданған 78 сала өкілі делегат ретінде қатысты.

Жиынды Жамбыл облысы оқу-ағарту, ғылым және жоғары білім қызметкерлерінің жергілікті кәсіподағының төрағасы Ерұлан Мағзымбеков ашып, сайлау ережесімен, жарғылық талаптармен таныстырды. Төраға бастамасымен сайлау тәртібіне сәйкес редакциялық, мандат пен есеп комиссиялары, хатшылық құрамы жасақталды.

- Былтыр «Білім қызметкерлері кәсіподағының Жамбыл аудандық комитеті» филиалы төрағасының өкілеттігі мерзімінен бұрын тоқтатылып, төраға міндетін уақытша атқару бір қызметкерге жүктелген болатын. Одан бері 6 ай өтті. Сайлауды бұдан ерте өткізуге Жамбыл мен Байзақ аудандарына қарасты елді мекендердің Тараз қаласына қосылуы себеп болды. Мәселен, Жамбыл ауданындағы 6 округке қарасты 14 білім ошағы, жалпы саны 1375 кәсіподақ мүшесі Тараз қаласына ауысты. Сайлау талаптары үміткерлерге жан-жақты түсіндірілді. Менің ұстанған басты бағытым - сайлаудың әділ өтуі, - деді Ерұлан Сәбенұлы.

Делегаттар тарапынан төрағалыққа 6 кандидат ұсынылды. Оның 3-ін әріптестері ұсынса, 3 кандидат өзін-өзі ұсынды. Оның екеуі ер, қалғаны әйел. Барлығы да кәсіподақ мүшесі. Арасында филиал төрағасының міндетін атқарушыдан бастап аудандық білім бөлімінің қызметкерлері, колледж оқытушысы, мектеп директорының орынбасары мен мұғалім де бар. Әрбір үміткер сайлауалды бағдарламасымен таныстырып, сайлаушылар көңілінен шығуға тырысты.

Жиын барысында сөз алған аудандық білім бөлімінің басшысы Зәуре Абдрасилова сайлау барысында қандай шешім шықса да көпшілік таңдауына ие болған азаматпен ынтымақтасып, бірлесе жұмыс істеуге дайын екенін жеткізді.

Дауыс беру делегаттардың ұсынысымен жабық жағдайда өтті. Сайлау қорытындысында сайлаушылардың басым дауысын (43) жинаған филиалдың маманы, соңғы 6 ай мерзімде төраға міндетін уақытша атқарған Ержан Шәлімбетов сайланды. Сөйтіп, филиал төрағалығы Ержан Шәлімбетовке сеніп тапсырылды.

Жиын барысында басқа да мәселелер қаралып, Қаулы қабылданды.

Жамбыл облысы оқу-ағарту, ғылым жіне жоғары білім қызметкерлерінің жергілікті кәсіподағы.