Аумақтық ұйымдардың жаңалықтары

Абай облысында пән мұғалімдерінің кәсіби құзыреттілігін арттыруға бағытталған «Мерейлі ұстаз» байқауы өтті.

Байқауға өңірдің білім беру мекемелерінен іріктелген 15 педагог қатысты. Қатысушылар қатарында жалпы білім беретін мектептердің мұғалімдерімен қатар колледж оқытушылары да бар.

Қазылар алқасының мүшесі болып «Қазақстандық оқу-ағарту,ғылым және жоғары білім қызметкерлерінің салалық кәсіптік одағының» Абай облысының кәсіподақ ұйымы» қоғамдық бірлестігінен Ибраев Сәбит Молдатияұлы қатысты.

Байқау үш кезеңнен тұрды. Алғашқы «Ұстаз шеберханасы» кезеңінде ұстаздар шығармашылық жұмыстарын таныстырды. Бұл бөлімде олардың кәсіби ұстанымдары мен құндылықтарының сабақ үдерісінде қалай көрініс табатыны бағаланды.

Екінші кезең – «Толық адамды қалыптастырудағы үлес» бағыты бойынша қатысушылар авторлық бағдарламалар, әдістемелік құралдар немесе ғылыми-әдістемелік мақалалар әзірлеп, TEDx форматында ұсынды. Мұнда олар білім берудегі тың көзқарасы мен жаңашылдығын көрсетті.

Үшінші кезең – «Ұстаз – ұлт тәрбиешісі» бөлімінде педагогтер әлеуметтік желіге арналған қысқа бейнероликтер әзірлеп, қоғамдағы ұстаз рөліне тоқталды. Бұл бөлімде олардың әлеуметтік белсенділігі, қоғамдық іс-шаралардағы орны мен тұлғалық келбеті бағаланды.

Байқау қорытындысы бойынша жеңімпаздар анықталды:

I орын – Шыңғыс Шынарбек, Электротехникалық колледж;

II орын – Айым Бұтабаева (Үржар ауданы), Ақәділ Кәрібжан (Бородулиха ауданы)

III орын – Гүлім Ерболатова (Абай ауданы), Арайлым Ахметбаева, Айгерім Кенжебаева (Семей қаласы).

Абай облысының оқу-ағарту, ғылым және жоғары білім қызметкерлерінің кәсіподақ ұйымы атынан жеңімпаздарға Алакөл демалыс орынына жолдамалар мен ақшалай сыйақылар берілді.

Абай облысының кәсіподақ ұйымы