Аумақтық ұйымдардың жаңалықтары

Жастар – қоғамның қозғаушы күші, елдің болашағы. Жастардың білімді, білікті, адал әрі жауапты болуы – еліміздің болашағы үшін аса маңызды. Осы ретте, Жамбыл облысының Тұрар Рысқұлов аудандық білім қызметкерлері кәсіподағының жастар қанаты аудандық білім бөлімінің қолдауымен еңбекке жаңа араласып, өтілін енді бастаған ұстаздарға арналған «Қалың қалай, жас маман?» атты педагогикалық, әдістемелік, психологиялық, кәсіподақтық қолдау сағатын өткізді.

Ынтымақ пен ізденіске толы тренингтермен басталған іс-шара республикалық «Үздік педагог» конкурсының жеңімпазы, Абай атындағы шағын орталықты мектептің бастауыш кәсіподақ ұйымының төрағасы Айнұр Тәтібекованың тамаша сұхбатымен жалғасты. Тағылымды ұстаз кейінгі жас мұғалімдерге өзінің еңбек жолындағы үлгі боларлықтай естеліктер, тілектер айтып, ұстаз мамандығын бағалай білуге шақырды. Жас мамандар үздік педагогтың өмір жолы мен педагогикалық тәжірибесі туралы сұрақтар қойып, жауаптар алды.

Келесі бөлім «Педагогикалық колейдоскоп» деп аталды. Мұнда жастарға бүгінгі күнгі білім беру жүйесіне қойылатын талаптар мен құндылықтар туралы аудандық білім бөлімінің әдіскері Райхан Каландарова шеберлік сынып көрсетті. Келесі кезекте кәсіподақ ұйымының жастар қанатының мүшелері Д.Құдыс, Т.Жәнділда, Е.Қонысбаев өз жұмыстарының бағыттарымен, еңбек шарты және оны мәні, кәсіподақтың жастар қанатының ұйымдастыратын қолдау шаралары мен болашақта атқаратын жұмыстарын таныстырды.

Еркін форматта өтіп, жас мамандар толғандырып жүрген мәселелерге жауап таба білген іс-шара соңында жас мамандар алған әсерлерімен бөлісіп, ұйымдастырушыларға алғыстарын білдірді. Олар мұндай шаралардың жаңадан келген ұстаздарға үлкен көмек беретінін, жұмысқа деген ынтасын арттыратынын атап өтті. Әсіресе, тәжірибелі ұстаздармен кездесу, олардың кеңестерін тыңдау жас мамандар үшін өте маңызды екенін жеткізді.

Жамбыл облысы оқу-ағарту, ғылым және жоғары білім қызметкерлерінің жергілікті кәсіподағы.