Аумақтық ұйымдардың жаңалықтары

ҚР Білім және ғылым министрінің 2012 жылғы 21 ақпандағы №57 бұйрығымен бекітілген «Мемлекеттік білім беру ұйымдарының бірінші басшылары мен педагогтерін лауазымға тағайындау, лауазымнан босату қағидаларына» енгізілген өзгертулер мен толықтыруларды тәжірибеде жүзеге асыру мәселелері Таразда өткен семинарда кеңінен талқыланып, түсіндірілді. Жамбыл облысы оқу-ағарту, ғылым және жоғары білім қызметкерлерінің Жергілікті кәсіподағының Біріккен комитетінің ұйымдастыруымен өткен семинарға мекеме басшылары мен басшы орынбасарлары, бастауыш ұйым жетекшілері қатысты.

Алғашқы болып сөз алған Жергілікті кәсіподақ төрағасының орынбасары Жанболат Орынбеков педагогтарды аттестаттау мәселесіне тоқталды. Ол өз сөзінде аттестаттау педагогтердің кәсіби шеберлігін арттырудың және білім беру сапасын жақсартудың маңызды құралы екенін атап өтті. Аттестаттау ережесіне жаңа қағидалардың енгізілуі педагогтердің біліктілігін бағалаудың әділдігі мен ашықтығын қамтамасыз ететінін, ал кәсіподақ тарапынан педагогтерге аттестаттау процесінде құқықтық әрі әдістемелік қолдау көрсетілетінін жеткізді.

Семинарда Жергілікті кәсіподақтың құқықтық қызмет басшысы Әлия Джолшибекова білім беру ұйымдарының бірінші басшылары мен педагогтерін лауазымға тағайындау, лауазымнан босату қағидаларына енгізілген өзгертулер мен толықтыруларды түсіндірді. Конкурс өткізу туралы хабарландыруда қамтылуы тиіс мәліметтерді айта келе модератор конкурстың мерзімі мен комиссия құрамына тоқталды.

- Конкурсты өткізу мерзімі және конкурстық комиссияның құрамы мемлекеттік білім беру ұйымының бұйрығымен айқындалады. Конкурстық комиссия кемінде комиссияның бес мүшесінен, оның ішінде комиссия мүшелерінің арасынан сайланатын төрағадан тұратын алқалы орган болып табылады. Конкурстық комиссияның құрамына білім беру ұйымы әкімшілігінің өкілдері, тиісті деңгейдегі әдістемелік кабинеттердің немесе білім беру ұйымының әдіскерлері, білім беру саласындағы азаматтық қоғам өкілі, аудандық немесе қалалық білім бөлімінің мамандары, педагогтер, байқаушы кіреді. Конкурстық комиссияның отырысы, егер оған комиссияның жалпы құрамының кемінде үштен екісі қатысса, өтті деп, ал оның шешімі заңды деп есептеледі, - деді Әлия Джолшибекова.

Сондай-ақ, әңгімелесу өткізу кезінде конкурстық комиссияның отырысы аудио-бейнежазбамен сүйемелденетінін, ол жазбалар бір жыл бойы сақталатынын да ескертіп өтті.

Семинар барысында қатысушылар жаңа қағидалардың негізгі аспектілері, аттестаттау кезеңдері және педагогтердің құқықтары мен міндеттері туралы толық ақпарат алды. Кейбір мәселелер бойынша қойылған сұрақтарға жауаптар беріліп, аттестаттау процесіне қатысты туындаған мәселелер талқыланды.

Жамбыл облысы оқу-ағарту, ғылым және жоғары білім қызметкерлерінің Жергілікті кәсіподағы.