ЖІГЕРЛІ ЖАС МАМАН
Иманғалиева Ұлпан Ілесқызы Маңғыстау туризм колледжіне өндірістік оқыту шебері ретінде жұмысқа орналасты. Қазіргі таңда студенттерге тамақтануды ұйымдастыру мамандықтарынан білім береді.
Оқытушылық қызмет барысында ол бірнеше республикалық чемпионаттарға қатысты. 2022 жылы Техникалық және кәсіптік, орта білімнен кейінгі білім беру ұйымдары педагогтарының III республикалық кәсіби шеберлік байқауында «Мейрамхана ісі» құзыреттілігі бойынша І орын алды. 2023 жылы осы байқауда «Наубайшы ісі» құзыреттілігі бойынша да І орын иеленді.
Қазіргі уақытта WorldSkills өңірлік чемпионатының «Мейрамхана ісі» құзыреттілігі бойынша бас сарапшысы болып табылады. WorldSkills Kazakhstan – бұл кәсіби білім беруді дамытуға, қазақстандық мамандардың біліктілігін арттыруға және олардың бәсекеге қабілеттілігін нығайтуға бағытталған ұлттық жоба. Жоба әлемдік қозғалыс аясында қабылданған халықаралық стандарттар мен әдістерге сәйкес ұйымдастырылады және өткізіледі.
Ұлпан Ілесқызы студенттерді WorldSkills стандарттарына сай мейрамхана қызмет көрсету ісіне дайындайды. Осы құзыреттілік аясында қатысушылар өз бойларында стрессқа төзімділік, шыдамдылық, еңбекқорлық, көшбасшылық, тәртіптілік, мұқияттылық және қарым-қатынас жасау қабілеттерін дамытады.
2024 жылы WorldSkills Kazakhstan республикалық чемпионатында «Мейрамхана ісі» құзыреттілігі бойынша Ұлпан Ілесқызы дайындаған студент Орынбасар Сарбалиев жүлдегер деп танылды.
Балалық шағынан бастап ұстаз болуды армандаған Ұлпан бүгінде колледжде студенттерін оқыта отырып, өзінің арманындағы жұмысты тапқанын түсінді. Себебі білім бере отырып, болашақ кәсіби мамандарды дайындауға үлесін қосып келеді..
Г.Кушанова,
Маңғыстау туризм колледжінің бастауыш кәсіподақ ұйымының төрағасы
