РЕСПУБЛИКАЛЫҚ КӘСІБИ ШЕБЕРЛІК БАЙҚАУЫ ЖЕҢІМПАЗДАРЫНЫҢ ЕҢБЕКТЕРІ ЕЛЕНДІ
Ақтөбеде «WorldSkills Kazakhstan 2024» ІХ республикалық кәсіби шеберлік чемпионатының жеңімпаздары мен республикалық кәсіби шеберлік байқауының жүлдегерлерін марапаттау шарасы өтті.
Салтанатты шараға «Қазақстандық салалық білім және ғылым қызметкерлері кәсіптік одағының Ақтөбе облыстық ұйымы» қоғамдық бірлестігінің өкілдері, облыстық білім басқармасының басшылары, техникалық және кәсіптік білім беру ұйымдарының басшылары, жеңімпаз педагогтер мен білім алушылар қатысты.
Ақтөбе облысы білім басқармасы басшысының міндетін атқарушы Нұргүл Бертілеуова құттықтау сөз сөйлеп, республикалық чемпионат пен кәсіби шеберлік байқауында орын алған педагогтерді облыстық білім басқармасының алғыс хатымен марапатталды.
Сондай-ақ, салтанатты жиында «Қазақстандық салалық білім және ғылым қызметкерлері кәсіптік одағының Ақтөбе облыстық ұйымы» қоғамдық бірлестігінің төрағасы Раушан Серікова 50-ге жуық кәсіподақ мүшесіне ақшалай сертификаттар мен жеңімпаздарға Ташкент-Самарқанд қалаларына жолдама табыстады.
Айта кетейік, WorldSkills стандарттары бүгінде отандық техникалық және кәсіптік білім беру жүйесіне енгізіліп, халықаралық деңгейде бәсекеге қабілетті мамандар даярлауда ерекше маңызға ие. Бұл – жас кадрларды экономиканың өндірістік секторына тартуға және елдегі техникалық және кәсіптік білімді дамытуға бағытталған бірден-бір жоба. Жыл өткен сайын аталмыш жобаның ауқымы кеңейіп, өз өміршеңдігі мен өзектілігін дәлелдеуде.
«WorldSkills» жобасы 16-22 жас аралығындағы жастарды қамтып, еліміздің әр аймағында жүргізіліп келеді. Ал қатысушыларды ҚР Оқу-ағарту министрлігі «Талап» КЕАҚ іріктеуден өткізіп, алдын ала дайындайды.
Жоба аясында Ақтөбе облысы командасының қоржынында 2 алтын, 3 күміс және 12 медальон. Сонымен қатар, салалар бойынша республикалық кәсіби шеберлік конкурстарында педагогтеріміз облыс қоржынын 8 бас жүлде, 1 алтын, 5 күміс, 8 қола және 1 медальон мен 4 номинациямен толықтырды.
-
Фото
-
