Аумақтық ұйымдардың жаңалықтары

Салалық кәсіподақтың Абай облыстық ұйымының Аягөз аудандық комитетінде білім беру мекемелерінің басшыларына, бастауыш кәсіподақ ұйымының төрағаларына, келісу комиссиясы мүшелеріне арналған «Әлеуметтік әріптестік» және «Еңбек даулары, олардың туындау себептері. Келісу комиссиясында еңбек дауларын шешу тәртібі.» тақырыбында семинар өткізілді. 120-дан астам сала маманы қатысқан семинар жұмысына Аягөз ауданының білім бөлімінің басшысы Нурғали Әзімбаев арнайы шақырылды.

Семинардың модераторы Аягөз аудандық комитетінің төрағасы Дариға Казангапова, спикері Абай облыстық кәсіподақ ұйымының құқықтық мәселелер жөніндегі бас маманы Нұргүл Абдулкаримова болды.

Кездесу барысында Н.Абдулкаримова әлеуметтік әріптестік туралы атап өтіп, Бас, Салалық, Өңірлік келісімдердің міндеттерімен, негізгі бағыттарымен таныстырды және келісім шарттардың барлық талаптары орындалуы керек екенін айтты.

Сондай-ақ, еңбек даулары туралы, білім беру ұйымдарында келісу комиссиясын құру тәртібі, даулардың себептері, оларға талдау жүргізіліп, шешу тәртіптері мен әр-түрлі кейстер қарастырылды.

Семинар барысында келісу комиссияларының мүшелері өздерінің жұмыс тәжірибесімен бөлісіп, пікір алмасты, түрлі ситуациялық жағдайлардың алдын алу мәселелері туралы да айтылды.

Семинар қортындысында Аягөз ауданы бойынша білім мекемелерінің келісу комиссиясы мүшелеріне арнайы оқу семинарының сертификаттары табысталды.

Кездесудің соңында қатысушылар өткізген семинардың маңызын атап өтіп, алғыстарын білдіріп, кәсіподақ ұйымымен келешекте бірлесіп атқаратын жұмыстарына сәттілік және табыс тіледі.

Абай облысының оқу-ағарту, ғылым және жоғары білім қызметкерлерінің кәсіподақ ұйымы