Аумақтық ұйымдардың жаңалықтары

Әрбір еңбек адамы зейнет жасына жеткенде әріптестері зор құрметпен, ыстық ықыласпен салтанатты түрде зейнеткерлікке шығарып салса, ол адам үшін одан асқан қуаныш жоқ. Бұл құрметті ұзақ жылғы еңбек пен ізденістің жемісі деп бағалауға болады.

Білім беру саласында ұзақ жылдан бері жемісті еңбек етіп келе жатқан Ақтөбе құрылыс-техникалық колледжінің дене тәрбиесі пәнінің жетекшісі, кәсіподақ мүшесі Кузумбаев Асқар Құрманғалиұлына құрмет көрсетілді.

Салтанатты шара Асқар Құрманғалиұлының өмір жолымен таныстырудан басталып, ақ тілек лебіздермен жалғасты.

Салтанатты құттықтау шарасына “Қазақстандық салалық білім және ғылым қызметкерлері кәсіптік одағының Ақтөбе облыстық ұйымы” қоғамдық бірлестігінің маманы Айжарық Серімбетов арнайы қатысты.

Жиынды кіріспе сөзімен ашқан Ақтөбе құрылыс-техникалық колледжінің директоры Гүлден Есенғалиева зейнеткер ұстаздың ел үшін аянбай қызмет еткенін тілге тиек етіп, Ақтөбе облыстық білім басқармасы басшысы Жайық Сұлтанның құттықтауын табыстады.

Басқосуда облыстық кәсіподақ өкілі Айжарық Серімбетов құттықтау сөз сөйлеп, Асқар Құрманғалиұлына «Сарыағаш» шипажайына жолдама сертификатын табыс етті.

Салтанатты жиында бірге қызметтес болған әріптестері Асқар Құрманғалиұлына ақ жол тілеп, әріптесінің үлгі боларлық тұстары көп екенін атап өтті.

Мереке кейіпкері өз кезегінде өзіне көрсетілген құрметке алғыс айтып, сала жұмысының алға басуына тілектес екенін білдірді. Сондай-ақ, қызығы мен қиыншылығы қатар жүретін білім саласына разы екендігін жеткізіп, зейнетке шығу шарасы кезіндегі ұжыммен қоштасу ерекше есте сақталатынын жасырмады.