Аумақтық ұйымдардың жаңалықтары

Соңғы кездері жалынды жастардың басын бір ортаға тоғыстырған «Quiz» интеллектуалды ойыны белсенді ұйымдастырылып, игі бастама болуда. Аталмыш ойын Мәртөк ауданының білімді жастарының таным көкжиегін кеңейтіп қана қоймай, қазақ тілімізді дамытып, жаңа интеллектуалды орта қалыптастыруды мақсат етті. Ақтөбенің Мәртөк ауданындағы мұндай шара аудандық білім қызметкерлері кәсіподағының жастар кеңесінің ұйымдастыруымен өтті.

Айта кетейік, бұл басқосу Ақтөбе облыстық білім және ғылым қызметкерлері кәсіподағының жастар кеңесінен бастамасымен өткізіліп отыр.

Ойынға барлығы төрт команда қатысты, олардың әрқайсысы өздерінің білімдері мен тапқырлықтарын сынауға мүмкіндік алды. Сайыс барысында командалар әртүрлі тақырыптағы сұрақтарға жауап беріп, өздерінің ой-өрістерін кеңейтті және білімдерін шыңдады. Әрбір топтың мүшелері өздерінің ұжымдық жұмыс істеу дағдыларын көрсетті, бұл сайыс олардың бір-бірімен үйлесімді жұмыс істеуін және күрделі мәселелерді шешудегі қабілеттерін дамытуға мүмкіндік берді. Бұл ойындар қатысушылардың логикалық ойлау қабілеттерін дамытуға, сондай-ақ олардың білімге деген құштарлығын арттыруға бағытталды.

Басқосуда аудандық білім бөлімінің басшысы Әсет Есалин мен білім қызметкерлері кәсіподақ ұйымының төрағасы Мұхамбетдин Ордабаев ауданда жас мамандар кеңесінің қайта жанданып жатқанын тілге тиек етіп, бүгінгі ұрпаққа саналы тәрбие, сапалы білім берудегі еңбектеріне сәттілік тіледі.

Іс- шараға қатысқан “Қазақстандық салалық білім және ғылым қызметкерлері кәсіптік одағының Ақтөбе облыстық ұйымы” қоғамдық бірлестігінің өкілдері мұндай басқосудың сөзсіз пайдалы екендігін жеткізіп, кәсіподақ мүшелерінн алғысын жеткізді.

- Бұл жай ғана басқосу емес, жастардың таным-көкжиектерін кеңейту, жаңа идеялас достар табу мүмкіншілігі. Бұл ойын - жаңа интеллектуал орта қалыптастыратын жер. Ең бастысы - қазақ тілін дамытатын үлкен жұмыс. Сондықтан да барлық қатысушыларға сәттілік тілеймін, - деді ұйым маманы Айжарық Серімбетов.

Одан кейін Мәртөк жастары қол күресі, асық ату, бес тас, арқан тартыс бойынша ұлттық спорт түрінен бақ сынады. Әр команда өздерін жан-жақты көрсете білді, бұл білім мен тапқырлықтың шын мәнінде маңызды екенін дәлелдеді.

Шара соңында жастарға облыстық және аудандық кәсіподақ ұйымының Алғыс хаттары табысталды, сонымен қатар 30-ға жуық жас маман жазғы демалыс кезінде Түркістан өңіріне тарихи-танымдық саяхатқа баруға мүмкіндік алды.

Сайыс соңында кәсіподақ мүшелері «Кәсіподақ гимнін» бірге шырқады.