Аумақтық ұйымдардың жаңалықтары

24-26 тамыз аралағында «Жайық» спорттық кешенінде білім беру ұйымдарының ұстаздары арасында футзалдан Қазақстан Республикасы білім беру ісінің Құрметті қызметкері, Ы.Алтынсарин төсбелгісінің иегері, педагогика ғылымдарының кандидаты Садыржан Самиғоллаұлы Жекеновты еске алуға арналған республикалық жарыс өтті.

С.С. Жекенов ұзақ жылдар Атырау аймақтық дене тәрбиесі және спортты дамыту орталығында еркін күрестен жаттықтырушы-мұғалім, директор қызметін абыроймен атқарды. Осы саладағы ұстаздық еңбек жолында 3 еңбек сіңірген спорт шеберін, 17 халықаралық дәрежедегі шебер, 30-дан астам спорт шеберін дайындады. 1 оқулықтың және 4 оқу әдістемелік құралдың авторы. Республикалық және халықаралық конференцияларда бірнеше ғылыми-зерттеу мақалалары жарық көрді.

Жарысқа Жамбыл, Маңғыстау, Атырау облыстары, Жылыой, Қызылқоға аудандандарынан, Х.Досмұхамедов атындағы университеттің, Каспий өңірінің қазіргі заманғы жоғары колледжінің және С.Жекеновтың құрдастары атынан «Достар» командалары қатысты. Салтанатты жиынның ашылу рәсімінде облыстық Балаларға қосымша білім беру оқу-әдістемелік және ғылыми-практикалық орталығы директорының м.а. Сания Махамбетова, республикалық «Өркен» балалар жасөспірімдер Дене шынықтыру орталығының директоры Садық Аяшов, «Атырау облысы білім және ғылым қызметкерлерінің кәсіптік одағы» қоғамдық бірлестігінің төрағасы Қылышбай Сүндетұлы,

спорт ардагері Ақмырза Батырқайыров, прокуратура саласының ардагері Хакім Көшқалиев және т.б. сөз сөйлеп, жарысқа қатысушыларға ақжарма тілектерін білдірді.

Екі күнге созылған жарыстың қорытындысында бірінші орынды – Маңғыстау облысының, екінші орынды – Жамбыл облысының, ал үшінші орынды – Атырау облысының командалары жеңіп алды.

Сондай-ақ, турнир барысында қазылар алқасының шешімімен «Үздік ойыншы» – Әміржан Алипов (Маңғыстау), «Үздік қақпашы» – Ринат Серкебаев (Маңғыстау), «Үздік қорғаушы» – Батырхан Орынбасаров (Атырау), «Үздік сұрмерген» – Төремұрат Рақымғали (Жылыйой ауданы) және «Үздік шабуылшы» – Олжас Сайлаубай (Жамбыл) танылды.

Жүлделі орынды иеленген барша командалар арнайы кубок, дипломдармен және медальдармен, «Атырау облысы білім және ғылым қызметкерлерінің кәсіптік одағы» қоғамдық бірлестігінің ескертіш сыйлығымен марапатталды.

«Атырау облысы білім және ғылым қызметкерлерінің кәсіптік одағы» ҚБ баспасөз қызметі