Аумақтық ұйымдардың жаңалықтары

Салалық кәсіподақтың Қызылорда облыстық ұйымы 26-30 шілде күндері Тұркістан облысы, Ақсу ауданында орналасқан «Ақ-су демі» сауықтыру орталығының базасында бастауыш кәсіподақ ұйымдарының төрағаларына «Кәсіподақ - еңбек адамының сенімді тірегі» тақырыбында семинар өткізді.

4 күнге созылған көлемді шарада кәсіподақ көшбасшылары табиғат аясында тынығып, тәжірибе алмасты, саладағы түйткілді мәселелер, жаңашылдықтар бойынша ой-пікірлерін ортаға салды. Тың форматта ұйымдастырылған семинар жұмысының бағдарламасы ауқымды.

Шараға Қазақстандық оқу-ағарту, ғылым және жоғары білім қызметкерлері салалық кәсіподағының құқықтық жұмыс , еңбек қауіпсіздігі және еңбекті қорғау бөлімінің басшысы Қыдырбаева Райхан Мамашиқызы қатысып ,. «Еңбек заңнамасы бойынша құқықтық сауаттылықты арттыру» тақырыбында ауқымды ақпарат берді.

Кәсіподақ көшбасшылары алдында облыстық ұйым мамандарымен бірге Шиелі, Қармақшы, Арал, Сырдария аудандық кәсіподақ ұйымдарының төрағалары кәсіподақ қызметін үйлестіру бағытындағы жұмыс тәжірибелерімен бөлісті.

Облыстық психологиялық қолдау орталығының бөлім басшысы, психолог. Мұстафаева Раушан Серікқызы «Кәсіби қарым-қатынас құзыреттілігі» тақырыбында дәріс оқыса, Қызылорда қаласы №264 мектеп-лицейінің бас есепшісі Оспан Оңдасын Әмзеұлы жалақы төлеу жүйесіне қатысты сөз сөйледі.

Семинардың әрбір сағаты түрлі іс-шаралармен белгіленіп, сұрақ-жауап, дебаттық форматтағы сөзталастар, мамандармен кеңесу сынды маңызды басқосулармен ерекшеленді. Сондай-ақ, жаңадан сайланған төрағалар түрлі қызықты тренингтер мен флешмобтарға белсенді қатысып, семинардың мазмұнды әрі креативті өтуіне жұмыла атсалысты.

Семинарға қатысушылар бастауыш кәсіподақ ұйымы жұмысын жетілдіру бойынша өзекті сұрақтарына жауап алып, қажетті ақпараттармен танысты.

Қазақстандық оқу-ағарту, ғылым және жоғары білім қызметкерлері салалық кәсіподағының баспасөз қызметі