КҮН ТӘРТІБІНДЕ – ЕҢБЕКШІ ӘЙЕЛДЕР МӘСЕЛЕСІ
Астана қаласында 2024 жылдың 12 сәуірінде «Еңбек саласындағы әйелдер: жаңа шешімдер уақыты» Қазақстан еңбекші әйелдер форумы өтті , шараны ұйымдастырған – ҚР Кәсіподақтар федерациясы. Аталған форумға Абишева Жадыра Мейрамханқызы Жетісу өңірінен Қазақстандық оқу-ағарту, ғылым және жоғары білім қызметкерлері кәсіподағының делегаты ретінде қатысты.
Форумға Қазақстан Республикасының Еңбек және халықты әлеуметтік қорғау министрі Светлана Жақыпова, Халықаралық Еңбек ұйымының еңбекшілер жұмысы жөніндегі Бюросының директоры Мария Хелена Андре, Біріккен Ұлттар Ұйымы үйлестірушісі Микаэла Фриберг-Стори сондай ақ әр саладан түрлі мамандық өкілдері, жалпы саны 60-тан аса делегат қатысты.
Форумның ашылуында Қазақстан Кәсіподақтар федерациясының төрағасы Сатыбалды Дәулеталин гендерлік теңдік мәселесін көтерді. «Гендерлік теңдік - жалпыға ортақ проблема, оны шешу бәріне пайдалы. Көптеген елде гендерлік кемсітушілікті жою мәселелерімен айналысатын мемлекеттік департаменттер немесе теңдік министрліктері құрылған. Кәсіподақтар федерациясы 2025 жылды гендерлік теңдік жылы деп жариялауды ұсынады. Кәсіподақтардағы әйелдердің өкілдігіне келсек, бастауыш төрағалардың көпшілігі әйелдер. Олардың дені адамдармен тікелей жұмыс істейді, олардың сұрақтарына жауап беріп, басшымен мәселелердің нақты шешімін табады. Бұның себебі әйелдер қауымы жауапты, атқарушы болғандықтан да шығар», - деп атап өтті. Кәсіподақ төрағасының ұсынысы Үкімет тарапынан да қолдау табатынына сенімдіміз.
Осындай жоғары деңгейдегі форумды басшылыққа алып ұйымдастырған ҚР Кәсіподақтар федерациясына алғысымыз шексіз.
