МЕРЕКЕЛІК МАРАПАТТАР ТАПСЫРЫЛДЫ
6 наурыз күні Доссор кентіндегі Бержан Қанатбаев атындағы орта мектепте ауданның 21 білім беру мекемесінен 45 кәсіподақ мүшесі қатысқан жиында:
- Біз ғана емес, қадір тұтқан бабалар,
Аналардан туған небір даналар.
Ана деген тіршіліктің тірегі,
Армысыздар, қасиетті аналар! – жүргізушінің дауысы мерекеге арналған шараның басталғанын білдірді.
Сахнаға «Атырау облысы білім және ғылым қызметкерлерінің кәсіптік одағы Мақат аудандық комитеті» Филиалының төрағасы Ерболат Құлтаев көтеріліп: «Қымбатты ұстаз-аналар, аяулы арулар! Көңілдеріңізге көктем шуағындай сезім мен нұр құйып ортамызға келген Халықаралық әйелдер күні құтты болсын. Аналар – өмірдің гүлі, көңілдің жыры, әр отбасының алтын діңгегі. Бүгінгі арайлап атқан нұрлы таңмен бірге әр шәкірттерің өзің деп соққан, аудандық салалық кәсіподақ ұйымы ұйымдастырған салтанатты жиынға қош келдіңіздер!», – деп, шараға шақырылған қонақтар мен қатысып отырғандарды таныстырды. Олардың арасында білім мен тәрбие жұмысына тер төгіп жүрген аяулы ұстаздардан бастап, еден мен кір жуушылар, есепшілер, кітапханашылар, бала күтушілер, медбикелер, аспазшылар және тағы да басқа сан алуан мамандық иелері қатысып отырғандығынан хабардар етті.
Мерекелік шара барысында ауданға педагогтарды аттесттау ережелеріндегі өзгерістермен, өткізу қағидалары мен шарттарын таныстыру мақсатында іссапармен келген «Атырау облысы білім және ғылым қызметкерлерінің кәсіптік одағы» қоғамдық бірлестігінің төрағасы Қылышбай Сүндетұлы бір топ кәсіподақ белсенділеріне марапаттар тапсырды.
Атап айтқанда, «Қазақстандық оқу-ағарту, ғылым және жоғары білім қызметкерлерінің салалық кәсіподағы» ҚБ-нің «Әлеуметтік әріптестікті дамытуға қосқан үлесі үшін» төс белгісімен О.Сарғұнанов атындағы орта мектептің директоры Самал Жаңбиршиева, «Білім және ғылым қызметкерлерінің кәсіподағына сіңірген еңбегі үшін» төс белгісімен С.Шарипов атындағы Доссор мектеп-интернатының директоры Бақытгүл Тиышбаева, Б.Қанатбаев атындағы орта мектебінің директоры Азамат Даулетқалиев, Х.Санбаев атындағы орта мектептің орыс тілі мен әдебиеті пәнінің мұғалімі Жанат Қалдығарина, «Қазақстандық оқу-ағарту, ғылым және жоғары білім қызметкерлерінің кәсіптік одағы» қоғамдық бірлестігінің «Құрмет грамотасы» Х.Санбаев атындағы орта мектебінің мұғалімі Сания Есказиева марапатталды.
Жиын соңы меркелік концертке ұласты.
«Атырау облысы білім және ғылым қызметкерлерінің кәсіптік одағы» ҚБ баспасөз қызметі
