КӘСІПОДАҚТЫҢ ҰЙЫМДАСТЫРУЫМЕН СПОРТТЫҚ САЙЫС ӨТТІ
Ақтөбе облысының Хромтау аудандық білім қызметкерлері кәсіподақ ұйымының қолдауымен қысқы демалыс кезінде №3 Хромтау орта мектебінде "Қызықты эстафета" тақырыбында спорттық сайыс өтті.
Жарысқа мектеп басшылығы, бастауыш сынып мұғалімдері, гуманитарлық пәндер бірлестігі және кіші қызметкерлер командасы қатысты.
Спорттық шараның басты мақсаты - педагогтер арасында салауатты өмір салтын қалыптастыру, ұжымдағы мұғалімдердің денсаулықтарын жақсарту, көңіл-күйлерін көтеру, ұжымның ауызбіршілігі мен ұйымшылдығын нығайту.
Шара барысында қатысушылар спорттық құралдарды қолданып, физикалық тапсырмаларды орындады. Эстафета соңында командалар арқан тартыс ойынында күш-жігерлерімен сынасып, спорттық қабілеттерін шыңдады.
Сайыс нәтижесінде жүлделі І орынды бастауыш сынып мұғалімдері жеңіп алды, ал ІІ орынға гуманитарлық пәндер мұғалімдері және ІІІ орынға кіші қызметкерлер мен мектеп басшылығы командалары ие болды.
Жеңімпаздарға Дипломдар мен медальдар, бағалы сыйлықтар табысталды.
