КӨРКЕМ ЕҢБЕК ПӘНІНІҢ ҮЗДІК МҰҒАЛІМІ АНЫҚТАЛДЫ
Байғанин аудандық білім қызметкерлері кәсіподақ ұйымының қолдауымен көркем еңбек пәнінің мұғалімдеріне арналған «Үздік көркем еңбек пәні мұғалімі – 2023» кәсіби байқауы өткізілді.
Байқаудың мақсаты - шығармашылықпен жұмыс жасайтын көркем еңбек пән мұғалімдерін анықтау және оларға қолдау көрсету, мұғалім мәртебесін көтеру.
Аталмыш байқау үш кезең бойынша өтті. Байқау кезінде қатысушылар өз шеберліктерін көрсетіп, өз іс-тәжірибелерімен бөлісті.
Байқау қорытындысында Қ.Мұханбетқалиұлы атындағы орта мектеп-гимназиясының көркем еңбек пәні мұғалімі Гүлмира Иманбаева «Үздік көркем еңбек пәнінің мұғалімі» атанды. Жеңімпаз ұстазға Байғанин аудандық білім қызметкерлері кәсіподақ ұйымының шипажайға жолдама сертификаты табысталды. Сондай-ақ, А.С.Пушкин атындағы орта мектебінің мұғалімі Гүлжайна Сәмиева ІІ орынға ие болып, аудандық білім қызметкерлері кәсіподақ ұйымының Ақтау қаласына тарихи-танымдық саяхатқа сертификаты берілді. Ал, жүлделі ІІІ орынға ие болған Қ.Жазықов атындағы орта мектебінің мұғалімі Венера Қайсарова мен Сағыз орта мектебінің мұғалімі Гүлсезім Қилыбаеваға аудандық білім қызметкерлері кәсіподақ ұйымының сыйақысы табысталды.
Байқауға қатысқан №3 Қарауылкелді орта мектебінің мұғалімі Сағындық Қоқаманов «Креативті ұстаз», Байғанин орта мектебінің мұғалімі Мейрамгүл Бердешова «Шығармашыл ұстаз», Т.Айбергенов атындағы орта мектебінің мұғалімі Марина Тайшыбаева «Жаңашыл ұстаз», С.Ешбаев атындағы орта мектебінің мұғалімі Раушангүл Былшымбаева «Ізденімпаз ұстаз» номинацияларына ие болды.
